यश व अपयशाच्या खेळात जिंकणाऱ्याचे खरं नाव, "धैर्य"..

आपण लहानपणापासून शिकत आलो आहोत की यश म्हणजे सर्वकाही. चांगले मार्क्स म्हणजे यश, मोठी नोकरी म्हणजे यश, पैसा, प्रतिष्ठा, ओळख म्हणजे यश. पण कुणीही आपल्याला हे सांगत नाही की आज जे यश वाटतं, ते उद्या सामान्य ठरू शकतं. आज ज्या शिखरावर उभे आहोत, तिथे उद्या आणखी कुणीतरी येऊन उभा राहू शकतो. यश म्हणजे कायमचा मुक्काम नाही, तो तर प्रवासातला एक थांबा आहे. त्या थांब्यावर थोडा श्वास घ्यायचा, पाणी प्यायचं आणि पुन्हा पुढच्या वाटेवर निघायचं. पण आपण मात्र तिथेच तंबू ठोकून बसतो. “आता झालं, आता मी पोहोचलो” असा गैरसमज करून घेतो. आणि इथूनच घसरण सुरू होते.